Wednesday, 24 March 2010

വെല്‍കം ടു കിണികിണി സര്‍വീസ്‌

"വെല്‍കം ടു കിണികിണി സര്‍വീസ്‌ ഓഫ് ഡിംഗ് ഡിംഗ് മൊബൈല്‍സ്... പ്ലീസ് പ്രസ്‌ 1 ടു കണ്ടിന്യൂ..."

"എതെന്തിനാപ്പോ ഒരു "പ്രസ് 1"? അങ്ങ് കണ്ടിന്യൂ ചെയ്താപോരെ? മണ്ടന്മാര്‍.."

ഒന്ന് ചിരിച്ച് രാജുമോന്‍ വണ്ണമര്‍ത്തി...

"പ്രസ്‌ വണ്‍ ഫോര്‍ ഇംഗ്ലീഷ്... ടു ഫോര്‍ മല്ലു... ത്രീ ഫോര്‍ കന്നട.. ഫോര്‍ ഫോര്‍ ജാപ്പനീസ്... ഫൈവ് ഫോര്‍ തുളു...സിക്സ് ഫോര്‍ ..."

ടെന്‍ഷനായിപ്പോയ രാജുമോന്‍ ഒന്നാലോചിച്ച് രണ്ടമര്‍ത്തി. രാജുമോന് പണ്ടേ അങ്ക്രെസി ഇഷ്ടല്ല.

"പ്രസ്‌ വണ്‍ ഫോര്‍ ബില്ലിംഗ് ആന്‍ഡ്‌ താരിഫ്‌ റിലേറ്റഡ് ..."

"ശ്ശെടാ... ഇവരെ ഇന്ന് ഞാന്‍..."

രാജുമോന് ലേശം കലി വന്നെങ്കിലും ഒന്നമര്‍ത്തി വെയ്റ്റ്‌ ചെയ്യാമെന്നു വെച്ചു.

"പ്രസ്‌ വണ്‍ ഫോര്‍ ബില്ലിംഗ്..പ്രസ്‌ ടു ഫോര്‍ താരിഫ്‌..."

"ഓഹോ...കളിക്യാ???"

പെരുവിരലീന്നു തരിച്ചു വന്നെങ്കിലും രാജിനു വണ്ണടിക്കാതെ നിവൃത്തിയില്ലല്ലോ...

"പ്രസ്‌ വണ്‍ ഫോര്‍ ബില്‍ അമൌണ്ട്..ടു ഫോര്‍ അണ്‍ബില്‍ഡ്‌ അമൌണ്ട്..."

"ഈശ്വരാ..."

രാജുമോന്‍ അറിയാതെ ദൈവത്തെ വിളിച്ചു പോയി... ഏതെങ്കിലുമൊരു "എക്സിക്യുട്ടിവിനെ" കയ്യില്‍ കിട്ടാന്‍ അവന്‍റെ കൈ തരിച്ചു...

അങ്ങനെ അര മണിക്കൂര്‍ നമ്പരടിച്ചു കറങ്ങിതിരിഞ്ഞ ശേഷം ഏതോ മധുരഭാഷിണിയുടെ ഫോണിലേക്ക് രാജ് എത്തിപ്പെട്ടു...

മധുരഭാഷിണി അമ്മച്ചി, "സാറേ.. വെല്‍കം ടു കിണികിണി സര്‍വീസ്‌ ഓഫ് ഡിംഗ് ഡിംഗ് മൊബൈല്‍സ്... സാറിന്‍റെ പേരൊന്നു പറയുമോ?"

"പറയാമെടി പറയാം... എല്ലാം പറയാം..." മനസ്സില്‍ വന്ന പാട്ടുകളെ അടക്കിപ്പിടിച്ച് രാജുമോന്‍ ഉത്തരിച്ചു.

"ഞാന്‍ ജബ ജബ"

"ഫോണ്‍ നമ്പര്‍?"

"2255"

"ഇഷ്ടപെട്ട ടി.വി. ചാനല്‍?"

"ആജ് തക്"

"ങേ... ഇഷ്ട നടന്‍?"

"ശക്തി കപൂര്‍"

"അമ്പട കള്ളാ... ഇഷ്ടഭക്ഷണം?"

"പൊറോട്ടേം ബീഫ്‌ ഫ്രൈയും... ബീഫ്‌ അധികം മോരിയാന്‍ പാടില്ലാട്ടാ..."

"ആഹാ... എല്ലാം ശരിയാണല്ലോ... അപ്പൊ താന്‍ തന്നെ ജബ ജബ... മിടുക്കന്‍... പറയൂ.. ഞാന്‍ ഏതു വിധത്തിലാ താങ്കളെ സഹായിക്കേണ്ടത്?"

"ആരു വിധത്തിലും സഹായിക്കണ്ട, ഉപദ്രവിക്കാതിരുന്നാല്‍ മാത്രം മതി. നിങ്ങളുടെ സഹായവും സേവനവുമോന്നും എനിക്കിനി ആവശ്യമില്ല. അത്രേ ഉള്ളൂ. ഒക്കെ ഞാന്‍ നിര്‍ത്താന്‍ തീരുമാനിച്ചു. അങ്ങോട്ടോ ഇങ്ങോട്ടോ തരാന്‍ വല്ലോം ഉണ്ടെങ്കില്‍ ഇപ്പൊ പറയണം, അത് പറയാനാ ഇപ്പ ഞാന്‍ വിളിച്ചേ..."

"അയ്യോ... എന്ത് പറ്റി സാറേ... ഞങ്ങള്‍ കിടിലമല്ലേ? സാറിന് പോരെങ്കില്‍ ഇനീം വേണേല്‍ കിടിലമാവാം.."

"ഊതല്ലേ... കിടിലം ആയിടത്തോളം മതി... അത് തന്നെ സഹിക്കാന്‍ പറ്റാഞ്ഞിട്ടാ..."

"ഓ..വേണ്ടേ വേണ്ട... അല്ലാതെ ഞാനെന്നാ പറയാനാ... ഇയ്യാള് പോയേ.."

"ആഹ... ഇപ്പൊ അങ്ങനായോ? എവിടെ എന്‍റെ സെക്യൂരിറ്റി ഡിപാസിറ്റ്?"

"ഓ... ഞാനിപ്പോ എന്‍റെ കമ്പ്യൂട്ടറില്‍ വായിച്ചോണ്ടിരിക്യാ ഇയാള്‍ടെ തനികോണം... അതേ, ഇടക്കൊക്കെ ബില്ലടക്കുന്നോര്‍ക്കാ ഇതൊക്കെ തിരിച്ചു കൊടുക്കുക... അല്ലാതെ എന്‍റെ അപ്പനല്ല ഈ സ്ഥാപനം നടത്തുന്നത്, ചോദിക്കുന്നോര്‍ക്കൊക്കെ എടുത്തു വെളമ്പാന്‍..."

"നീ കൊള്ളാമല്ലോ മോളേ... എപ്പഴാ ഞാന്‍ ബില്ലടക്കാഞ്ഞേ? ഏ? എപ്പഴാന്ന്?", രാജുമോന്‍റെ രക്തം തിളച്ചു.

"കഴിഞ്ഞ 3 മാസത്തെ..."

"ഓഹോ..അത്... അത്... ആഹാ... അപ്പൊ അതിനു മുന്‍പൊക്കെ അടച്ചതോ.. അതിനൊന്നും ഒരു വേലേം ഇല്ലേ?", തിളച്ച രക്തം വാങ്ങി വെച്ച് രാജുമോന്‍ ഡീസന്‍റ് ആയി.

"വെല ഉണ്ടല്ലോ... അതല്ലേ അപ്പോഴൊന്നും കണക്ഷന്‍ കട്ട്‌ ചെയ്യാഞ്ഞത്.."

"വേലയെറക്കല്ലേ... മര്യാദക്കെന്‍റെ കാശു തരുന്നോ ഇല്ലയോ.. എനിക്കിപ്പറിയണം..."

"തരുന്നില്ല"

"ദേ പെണ്ണേ, കളിക്കല്ലേ. നൂറു കാര്യം ചെയ്യാനുള്ള കാശാ. പെണങ്ങല്ലേ... ആരോടും പറയണ്ട, ആ കവലക്കടുത്തുള്ള ചായക്കടയില്‍ വന്നാ മതി. നിനക്ക്‌ ഞാനൊരു 500 ഉര്‍പ്യ തന്നെക്കാ, എന്തേ?"

"ദേ കെളവാ... എന്‍റെ വായിലിരിക്കുന്നതൊന്നും കേക്കാണ്ടേ പോയേ... "

"അയ്യോ ഞാന്‍ കേളവന്‍ ഒന്നുമല്ല... നല്ല തണ്ടും തടിയുമുള്ള ചുണക്കുട്ടനാ..."

"ആരായാലും... താന്‍ വെച്ചിട്ട് പോയേ... എനിക്ക് അപ്പറത്തെ ഷാജിടെ കൂടെ ഊണ് കഴിക്കാന്‍ പോണം. ഇനീം വൈകിയാ അവന്‍ ആ ഉണക്കമീന്‍ ബിജിമോള്‍ടൊപ്പം പോവും. അല്ലെങ്കിലും തന്നോടിതൊക്കെ പറഞ്ഞിട്ടെന്തിനാ? എന്‍റെ വെഷമം എനിക്കല്ലേ അറിയൂ. താനൊന്നു പോയി തര്വോ?"

"അപ്പൊ എന്‍റെ ഡിപാസിറ്റ്‌????"

"ശ്ശോ! താനാ ഡിപാസിറ്റിന്നൊന്നു വിടെടോ, എന്നിട്ട് ഇവിടെ വന്നൊരു പരാതി എഴുതിത്താ. ഒക്കെ ശരിയാക്കാം."

"എന്നെ വിളിച്ചു വരുത്തി സെക്യൂരിറ്റിയെക്കൊണ്ട് എടുത്തിട്ട് അലക്കാനല്ലേ?"

"അല്ല മനുഷ്യാ... താന്‍ ഞാന്‍ പറയുന്നതൊന്നു കേള്‍ക്ക്..."

"ഹും.. ശരി... ഞാന്‍ അപ്പൊ നാളെ വീട്ടില്‍ പറഞ്ഞിട്ട് അങ്ങോട്ട് വരാം..."

"ശരി. ഒക്കെ ഇവിടെ വന്നിട്ടു നമുക്ക് ശരിയാക്കാം. സാറിനു മറ്റെന്തെങ്കിലും സഹായം ചെയ്യേണ്ടതുണ്ടോ?"

"ശ്ശോ, നമ്മളിത്രേം അടുപ്പമായ നിലയ്ക്ക് സാറെന്നോന്നും വിളിക്കണ്ടട്ടാ. പിന്നെ ചോദിച്ച നിലയ്ക്ക് എനിക്കൊരു സഹായം വേണമായിരുന്നു. ആ വളവില്‍ ഉള്ള നിങ്ങടെ കമ്പനീടെ അഞ്ചേക്കര്‍ സ്ഥലമില്ലേ? അതും പിന്നെ ആ കൃഷിയാപ്പീസിനു മുകളിലെ ടവറും എനിക്ക് ചുമ്മാ സഹായമായി കിട്ടിയാ കൊള്ളാമെന്നുണ്ട്. തര്വോ? അല്ല തര്വോ? ഇല്ലല്ലോ?അപ്പോപ്പിന്നെ ഒരു പാട് ഡയലോഗടിക്കരുത്, കേട്ടോ മോളെ? ഹല്ലാ പിന്നെ.."

"@#$%^$#$!@$%#@$@!$^&"

"ഓക്കെ. അപ്പൊ എല്ലാം പറഞ്ഞ പോലെ"

"ഓക്കെ. കിണികിണി-യില്‍ വിളിച്ചതിനു നന്ദി... ടാ ഷാജീ, നിക്കടാ, ഞാനും വരുന്നു.."

"ഓ ഓ.."

<ക്ലിംഗ്>

Friday, 19 March 2010

ഭും!!!

ഭും...!!!

ആറാം ഫ്ലോറിനെ പിടിച്ചു കുലുക്കിക്കൊണ്ട് ലാബില്‍ നിന്നുമൊരു പൊട്ടിത്തെറി ശബ്ദം ഉയര്‍ന്നു.

ക്യു.ഏ. മാനേജര്‍ പരമു ഉള്‍പ്പെടെ സകലമാന ലോകരും ലാബിലേക്ക്‌ പാഞ്ഞു.

ചെന്നപ്പോള്‍ എന്താ അവസ്ഥ?

കമ്പ്ലീറ്റ്‌ റിഗ്രഷന്‍ സെറ്റപ്പ് പൊട്ടിത്തകര്‍ന്നു തവിടുപോടിയായി കിടക്കുന്നു. ആകെ പുകമയം... കരിഞ്ഞ വയറിന്‍റെയും മറ്റും മണവും, ആകെക്കൂടെ ജഗപൊഗ...!

"ഓ.. നന്ന ദേവരെ... എന ഇദു... ഹേഗ ആയിത്തു ഇദു????", ദുരന്തസീന്‍ കണ്ട പരമു അറിയാതെ മാതൃലാംഗ്വേജില്‍ നിലവിളിച്ചു.

"ഇറ്റ്‌സ് ഓള്‍ ഗോണ്‍ മേന്‍. ഹൌ കാന്‍ ദിസ് ഹാപ്പന്‍??", പലരും ഒന്നിച്ച് ഒരേ ഡയലോഗ് അടിച്ചു.

"ഷോര്‍ട്ട് ആയതാണെന്നു തോന്നുന്നു", തിരുവല്ലക്കാരന്‍ ടെസ്റ്റര്‍ തടിയന്‍ ഞെട്ടലോടെ ആത്മഗതം ചെയ്തു.

പരമുവിന്‍റെ അന്നനാളത്തിലൂടെ ലെവന്‍ കെ.വി. സൈസ് ഷോക്കിന്‍റെ ജമ്പോ പാക്കറ്റ്സ് ഒന്ന് രണ്ടെണ്ണം‌ പാഞ്ഞു പോയി. നാളെ തുടങ്ങാനിരുന്ന ടെസ്റ്റിങ്ങിനുള്ള സെറ്റപ്പാണ്. വല്യ മാനേജര്‍ പാകിസ്താനിയോടിനി എന്തു പറയും? ഇന്നലത്തെ വീക്`ലി സൊറ-മീറ്റിംഗില്‍ കൂടി ക്രിക്കറ്റ്‌ വിഷയത്തില്‍ അങ്ങേരെ എടുത്തിട്ട് വാരിയതാണ്. വേണ്ടായിരുന്നു. എന്നാലും കഴിഞ്ഞ ആഴ്ച ഓഡിറ്റ്‌ കഴിഞ്ഞ ലാബാണ്. ഈ അബദ്ധമെങ്ങനെ സംഭവിച്ചു? പരമു ചുറ്റിനും നോക്കി.

കമ്പ്ലീറ്റ്‌ ടെസ്റ്റര്‍മാരും ആഹ്ലാദം കലര്‍ന്ന അമ്പരപ്പില്‍ നില്പാണ്. ആര്‍ക്കും ഈ മഹാഭാഗ്യം വിശ്വസിക്കാന്‍ കഴിയുന്നില്ല. ഇനി ഇതൊന്നു നന്നാക്കി ഓടാന്‍ പാകമാകുമ്പോളേക്കും മിനിമം രണ്ടാഴ്ച എടുക്കും. എല്ലാവരും പരമുവിനെ നോക്കി വളിച്ച ചിരികള്‍ സംഭാവന ചെയ്തു.

"ദ്രോഹികള്‍", പരമു മനസ്സില്‍ പറഞ്ഞു. എല്ലാര്‍ക്കും ഇന്നത്തെ പണികളും കൊടുത്ത്‌ നാല് തെറിയും വിളിച്ച് ടി.ടി. കളിക്കാന്‍ നില്‍ക്കുമ്പോഴല്ലേ ഈ ഇടിത്തീ തലയില്‍ വീണത്‌? പരമു നിരാശയുടെ അഗാധതയിലേക്ക്‌ മുങ്ങാംകുഴിയിട്ടു.

തിരിച്ച് സീറ്റിലെത്തിയപ്പോള്‍ തടിയന്‍ അടുത്തെത്തി.

"ഇനിപ്പോ കുറച്ചൂസം സുഖായില്ലേ?", ഞാന്‍ ചോദിച്ചു.

"യെസ്. രക്ഷപെട്ടു. ഇത്ര കൃത്യമായി ആ സെറ്റപ്പിന്‍റെ മര്‍മ്മം പൊളിക്കാന്‍ പറ്റുമെന്നു ഞാന്‍ കരുതിയില്ല."

"എന്തൂട്ട് ന്ന്??!!"

"കുറെ നാളായി ആ പരട്ട പരമു ഞങ്ങള്‍ക്കിട്ട് പണിയുന്നു. ഇതയാള്‍ക്കുള്ള ഒരു ഉഗാദി ഗിഫ്റ്റ്‌ ആണ്... ഹിഹി!"

"അണ്ണാ... നീ എന്താ ഉദ്ദേശിച്ചത്? അപ്പോ ഇതിലൊരു കൊണ്‍സ്പിരസി...?!"

"അതെ മോനെ... കഴിഞ്ഞ തവണ നാട്ടില്‍പോയപ്പോള്‍ വാങ്ങി വെച്ച ഒരു ഗുണ്ട്... ശിവകാശി മെയ്ഡ് വെറുമൊരു കൊച്ചു ഗുണ്ട്. ദാട്സ് ആള്‍, റിഗ്രഷന്‍റെ അപ്പൂപ്പന്‍ സെറ്റപ്പ് വരെ ഇതേലെ ഭും!!!! പിണ്ണാക്ക് പരുവമാവും. ഹിഹിഹി..."

തടിയന്‍റെ ചിരി എന്‍റെ ക്യുബിക്കിളിനു ചുറ്റും മുഴങ്ങി. അറിയാതെ ഞാന്‍ ലാബിലെ എന്‍റെ സ്റ്റാക്ക് സെറ്റപ്പിനെ നോക്കിപ്പോയി. പ്രത്യാശയുടെ ചെറു പാക്കറ്റുകള്‍ എന്‍റെ തലച്ചോറിന്‍റെ പോര്‍ട്ടില്‍ വന്നു ഹിറ്റിക്കൊണ്ടേയിരുന്നു... വിത്ത്‌ നോ ജിറ്റര്‍ അറ്റ്‌ ആള്‍... :)

<തുടര്‍ന്നാല്‍ ചെലപ്പോ പണി പാളും>

Tuesday, 9 March 2010

വിമന്‍സ്‌ ഡേ

എന്തായിത്...???!!!

ഇന്നലെ വരെ പപ്പും പൂടയും നിറഞ്ഞ്, ചിക്സ്‌ ലാന്റിലെ കൂട്ടില്‍ തീറ്റക്കും വെള്ളത്തിനും പിന്നാലെ പാഞ്ഞുനടക്കുന്ന നനഞ്ഞ കോഴികളെ ഓര്‍മിപ്പിച്ചിരുന്ന കൂതറ ലേഡീസ്‌ മുഴുവനും ഇതാ വൃത്തിയായി ഡ്രസ്സ്‌ ചെയ്തു വെച്ചിരിക്കുന്ന റിയല്‍ ഗോള്‍ഡ്‌ ബ്രോയലെഴ്സ് ആയി മാറിയിരിക്കുന്നെന്നോ??

മുറ്റം അടിക്കാനും പാത്രം മോറാനും വരുന്ന ഈസ്റ്റ്മാന്‍ കളര്‍ ജയമാലയെ ഓര്‍മ്മിപ്പിച്ചിരുന്നവര്‍ ഇന്നിതാ ബോഡി ഗാഡിന്റെ പോസ്റ്ററിലെ നയന്‍ താരയെപ്പോലെ കണ്ണുകളെ ചൂണ്ടയിട്ട് കൊളുത്തി വലിക്കുന്നോ..??

ഇന്നലെ വരെ വെറുമൊരു അഹങ്കാരി കുതിരയായി മാത്രം കണ്ടിരുന്ന ആ കോണിലെ വെളുത്തു മെലിഞ്ഞ
ടെസ്റ്റര്‍ കന്നടിഗപൈങ്കിളി... ഇന്നിതാ അവള്‍ മംത മോഹനെപോലെ കണ്ണെഴുതി പൊട്ടും തൊട്ട് ചുവപ്പും കറുപ്പും ഇടകലര്‍ന്ന അലക്കാനൊരു സാരിയുമുടുത്ത് മന്ദഹാസം പൊഴിച്ച് പാറിപ്പാറി നടക്കുന്നോ?? (ഈശ്വരാ... കണ്ട്രോള്‍ കുടി..)

ആയ കാലത്ത്‌ ഇവരെയൊക്കെ ഒന്നു മൈന്‍ഡ്‌ ചെയ്യാമായിരുന്നു..ചെയ്തില്ല... എന്‍റെ പിഴ...എന്‍റെ ഊക്കനൊരു പിഴ...

ഒരു സാരിക്ക്... കേവലമൊരു സാരിക്ക് ഇത്രേം മാജിക്കല്‍ പവറോ???!!!!

മൈ ഡിയര്‍ കടവുള്‍.... ഒടുക്കത്തെ ചതിയായിപ്പോയി കേട്ടോ...

Friday, 5 March 2010

കിളിക്കൊഞ്ചല്‍ 2.0

മൊബൈല്‍ഫോണ്‍ കാണാതെ അന്വേഷിച്ചു വിഷമിച്ചു നടക്കുന്ന ചെറിയ കിളിയോട് വലിയ കിളി: സാരമില്ലെടി, തല്‍ക്കാലം നീ എന്‍റെ ഫോണ്‍ ഉപയോഗിച്ചോ.

കുഞ്ഞിക്കിളി: അതിനു നമ്പറൊന്നും എനിക്കറിയില്ല, ഒക്കെ ആ സിമ്മിലല്ലേ?

വലിയ കിളി: അതിനെന്താടി? തല്‍ക്കാലം നിന്‍റെ സിം എന്‍റെ ഫോണില്‍ ഇട്ട് വിളിച്ചോന്നേ...

കുഞ്ഞിക്കിളി: ഓ.. ഞാനതോര്‍ത്തില്ല..

രണ്ടു കിളികളും ഹാപ്പി ആയി...

* * *

 
ജാലകം